على قد ما أنا فرحان بالي حصل على ما قد ما أنا مضايق معماريا!! هو طبعا كل ثورة في الدنيا لها مكاسب و لها مساوئ، بس للأسف هتكلم عن مسوء واحد فيها و هوا إنعكاس الثورة على شكل العمارة في مصر، من وجهة نظري طبعا.
عن تجربتي الشخصية في الثورة فأنا شايف إن الثورة أثرت على العمارة بشكل سلبي تماما حتى الأن. و ده ليه بقى؟ عشان عوامل كتير، أهمها إنعدام الأمان في البلد و غياب الشرطة أساسا و ده الى هتكلم عليه هنا فقط. و مش بس كدة لأ ده كمان الجهل المعماري و عدم التخطيط للمستقبل و إنعدام فكرة التنمية المستدامة. بقى كل واحد بيبص تحت رجليه بدون مايشوف إيه الي هيحصل بكرة و يفكر في الاتجاه ده!
نيجي على أول حاجة و أهم حاجة، و هي مفيش أمان: من أول ما الشرطة انسحبت و البلطجية ظهروا والناس مرعوبة و بتشكل لجان شعبية و بتحاول تحمي نفسها بأي شيء قدامها. تلاقي الناس نازله في الشارع بأي حاجه تضرب بيها. الي نازل بشومه والي نازل بعصاية كنبه و الي نازل بعوكاز. و الناس الشيك نزلة بمساداسات و عصاية جولف و كدة. و ده أثرنفسيا أكتر على الناس و الموضوع بدأ يتطور و الناس تعمل أبواب حديد على العمارات و المباني من بره. و شكل أمها زفت و معموله بطريقة منيله و حاطينها قدام الباب الشيك النظيف القزاز بتاع العمارة!! فدلوقتي كل واحد عايز يعمل عماره جديده هايحط عليها باب حديد!! يعني إحنا بنادي نقول يا جماعة الدنيا بتتقدم و الأبواب الحديد ديه حاجة من أيام الفراعنه. المفروض إحنا ندور على الشفافية و ندور على مواد البناء بتاعت العصر الي إحنا فيه تمثل العصر بتاعنا و بنبوس يد الناس عشان تفهم إن فيه حاجة إسمها قزاز و ألومنيوم و و فيبر و و و ...و في الأخر نرجع و نعمل حديد تاني!! هول إحنا بنطلع لقدام ولا بنرجع لورا؟؟
و مش بس كدة. تلاقي كل المولات و السوبر ماركت و المحلات المحترمه والغير محترمه دهنوا الواجهات بتاعتهم بلون معفن علشان البلطجية مايشوفوش إيه جوه (ولا إحنا كمان هنشوف فيه إية جوه) لأ والأنيل إن لو المحل كبير فبيعمل حوائط مصمتة مكان الواجهة القزاز و شكلها خراااا جدا.
ده ببساطة شديده يدل على إن الفكر المعماري الي عند الناس بيرجع لورا و ده لتمسكهم بالمرحلة القديمه بتاعت الأمان من عدمه و إنهم مش بيبصو لقدام. إحنا لو جبنا أي حد أهبل من بره و مشيناه في الشوارع هيقول ديه أفغانستان. هيقول ديه عالم لسه عايشة ورا المشربية و خايفين و داخلين جوا جحورهم.
يا جماعة مواد البناء ديه لها انطباعات نفسية مهمة جدا بتفرق من مادة للتانية. و لازم إستخدامها بعناية ، مثلا يعنى القزاز بيعبرعن الشفافية و الصدق في التعامل و كمان يعني الانفتاح و عدم الخوف.
فيه مواد تانية شكلها يوحي بعدم الاستقرار والرعب النفسي والجهل زي الحوائط الطوب الأحمرالي مدهونه غلط و ديه ما أكثرها في بلدنا.
ثم إن الشكل الجمالي طبعا أهم و أهم و أهم لأن برضو بيأثر على الذوق العام في البلد و على زوق المصرين نفسهم و على نفسيتهم و على حياتهم اليومية و طريقة تعملهم مع بعض و كمان طريقة تربيتهم لأولادهم . يمكن الناس مبتحسش بضخامة الموضوع و تأثيرة لأن للأسف الثقافة المعمارية و تأثير الأشكال المعمارية على نفسية الإنسان تعتبر منعدمة فى البلد تماما.
الي عايز أقوله إن إحنا بندور على الحرية و الديمقراطية فيبقى لازم نبص لقدام و نبتدي نتعامل على ذلك و نحرر أفكارنا مش بس نبص للمرحلة الي إحنا فيها دلوقتي والحنين للماضي و الخوف و نستخبى ورا الحيطان.
No comments:
Post a Comment