انا كنت فى مدينه نصر و بتابع تويتر من على التيليفون و كنت منتظر اقابل صديقتى (ل) فى وسط البلد فى حدود الساعه 8 مساءا. و لما شفت التغريدات على تويتر ان فى ضرب نار و ناس بتموت عند ماسبيرو قلت لازم اروح اشوف بنفسى لان التغريدات المكتوبه كانت مرعبه جدا و كان لازم انزل اساند الناس الى بتموت ديه و اشوف الحقيقه بنفسى و بالمره اقابل صديقتى. اخدت تاكسى و طلع كوبرى اكتوبر و المرور توقف من عند وزاره الماليه و لكن الناحيه التانيه كانت فاضيه تماماً...حتى ان وصلنا بعد رمسيس بشويه و شفت عربيه امن مركزى راكنه فى الجهه العكسيه (الى رايح مدينه نصر) على الكوبرى و كان فيه سياره اسعاف جايه..و اول ما عدت سياره الاسعاف من قدام عربيه الامن المركزى..العربيه تحركت و مشيت ورا سياره الاسعاف.
 |
| صوره (1) عند المتحف |
و التاكسى نازل من منزل اكتوبر عند عبد المنعم رياض كان فيه ناس كتير جدا واقفه عند المنزل و تحت الكوبرى و عند الهيلتون و خليت التاكسى ينزلنى عند المتحف. ملاحظتش اى عربيات كانت بتعدى خالص تحت الكوبرى او حول عبد المنعم رياض..كلمت واحد صاحبى (م) كنت عارف انه عند ماسبيرو من على تويتر. كان ورا المتحف عند الحزب الوطنى و جالى عند تمثال عبد المنعم رياض، و انا واقف منتظره سمعت ضرب نار كتير او قد يكون ضرب غاز مش قادر احدد بالظبط لأنه كان من بعيد من ناحيه ماسبيرو...و كان المتظاهرين حولى متفرقين ما بين الى واقف عند المتحف و الى عند شارع الجلاء و الى تحت الكوبرى و الغالبيه العظمى كانت حول التمثال...شويه و جات مسيره بيهتفوا و رايحين ناحيه ماسبيرو..اول ما عدت المسيره ديه كان صديقى جه..و بدأت ريحه الغاز المسيل تيجى لان يومها كان اتجاه الريح ناحيتنا و شفت اكتر من 3 قنابل غاز اتحدفوا من فوق الكوبرى قدام الهيلتون على المتظاهرين تحت قدام الهيلتون من ناحيه النيل.
و بدأنا نهتف و العدد زاد فى عبد المنعم رياض عند الجراج تحت الكوبرى و اتحدف علينا قنبله غاز لكنها وقعت بعيد كانت جايه من فوق الكوبرى و رايحه ناحيه المتحف و كان فيه ناس كتير بتقول خلو بالكوا فى حاجات بتتحدف من فوق. بعد شويه جت عربيه مطافى صفرا كبيره من ناحيه الهيلتون و رايحه على دوران عبد المنعم رياض..الى سايق كان سايق بيهستيرا جنونيه و خاصه ان العدد كان كبير فى الشارع فكان ممكن يخبط اى حد بسهوله. كلنا اتفرقنا و طلعنا على الارصفه يمين و شمال و ناس حدفت طوب كتير جدا على العربيه. اول ما قرب من التمثال لقيت العربيه وقفت و دخلت على الرصيف. فهمت ان السواق اصيب و العربيه كانت مايله. على ما جريت اشوفها كان باب السواق بيتفتح و مشفتش السواق اذا كان فعلا اصيب ولا ايه الى حصله و الناس اتلمت حوالين العربيه و كان فيه ناس كتير بتفكر تحرقها لكن شويه شباب طلع فوق العربيه يهدى الناس. فى نفس الوقت كنت برضه سامع صوت ضرب قنابل غاز و كان ريحته واصله عندنا برضه. بعد شويه لقينا تشكيل نازل من على الكوبرى متجه ناحيه شارع الجلاء، التشكيل كان عباره عن: ناس لابسه مدنى اولا و على الجناب ثم عساكر امن مركزى كتير جدا و فى النص عربيه امن مركزى بتضرب قنابل غاز على قدام ناحيه شارع الجلاء على الناس الموجوده و اول ما نزل هذا التشكيل تحت الكوبرى بقت الناس الى حولي و حول التمثال تحدف طوب و فى نفس الوقت الناس الى كانت لابسه مدنى بتحدف طوب علينا...و بدأت معركه الطوب ما بين المتظاهرين الى كانوا معايا عند التمثال و الناس الى واقفه عند موقف اتوبيسات السوبرجيت و لاحظت عربيات اسعاف كانت واقفه عند مدخل شارع رمسيس و كان فيه مصابين و تحركت الاسعاف بعد شويه..و كذالك كان فيه اقباط كتير ماسكين الصليب و انضموا الينا..هتفنا ضد المشير و ضد الحكم العسكرى و قلنا مسلم و مسيحى ايد واحده و كان فيه ضرب طوب و شفت واحد من ناحيتنا حاول يحدف مولوتف بس وقعت تحت الكوبرى و ما وصلتش..
 |
| صوره (2) هجوم البلطجيه عند ميدان عبد المنعم رياض و محاوله تفريقهم بالمياه |
و بعدين الضرب اشتد علينا و طلعنا نجرى ناحيه التحرير و الناس الى لابسه مدنى ديه بتحدف علينا طوب و كان معاهم عصيان و كان برضه معاهم عساكر جيش بتحدف علينا طوب. شفت عسكرى منهم لابس الخوذه السوداء و ماسك فى ايده درع و كان بيجرى ناحيتنا لحد ما رجعنا ورا عربيه المطافى. ناس كانت عايزه تولع فيها عشان توقف زحف البلطجيه و ناس قالت نستخدم انابيب المياه و نرش عليهم. و فعلا طلع كذا واحد حاول يفتح خراطيم الميه بتاعه العربيه و فشلوا كلهم الا واحد بس عرف و بدأ يرش الميه ناحيه البلطجيه ساعتها وقفوا و تراجعوا لمكانهم تانى تحت الكوبرى و عند موقف الاوتوبيسات و بدأنا نتجمع تانى و بدأ حدف الطوب تانى و جم ناس من ناحيتنا و عملوا خط من النار فى الارض و حد جاب عجل عربيه و ولع فيه تحت الكوبرى وتقدمنا شويه لحد قرب الموقف و بعدين تراجعنا تانى لحد ما البلطجيه قربوا على ميدان عبد المنعم رياض. صديقى مشى و جاتلى صديقتى الى كنت هقابلها فى الاول. و جه فى دراعى اليمين و فى رجلى اليمين طوب و لكنه جرح سطحى.
 |
| صوره (3) عند ميدان عبد المنعم رياض |
و اذ فجأه الطوب من الناحيتين وقف و انضمينا على بعض!! و قعدنا نهتف ايد واحده! مش انا لوحدى الى استغربت من كده بس ناس كتير حواليه استغربوا برضه، و كمان و احنا واقفين واحد شاور على واحد من الناس الى انضمت الينا و قال شايفين السلاح بتاعه مخبيه تحت قميصه ازاى احنا ايد واحده!! و فى اقل من 3 دقايق كلنا اتحركنا فى مسيره مره واحده ناحيه ماسبيرو بنهتف مسلم و مسيحى ايد واحده. و عدت المسيره من قدام الهيلتون لكن انا طلعت فوق الكوبرى عشان اصور من فوق و جيت انزل من ناحيه ماسبيرو لاقيت كميه كبيره جدا من عربيات الامن المركزى و العساكر واقفين ضهرهم للنيل. و العساكر قافلين منزل الكوبرى و الناس الى كانت معايا فوق رجعت تانى و فيه الى عمل زي و نط من على السور علشان ننضم لبقيت الناس..قعدت هناك لمده حوالى 10 دقايق و يتخللها هتافات. و فجأه كل الناس طلعت تجرى ناحيه الفندق و تحت الكوبرى هرباً من ماسبيرو و شفت عساكر الجيش و الامن المركزى على مطلع اكتوبر (الى انا كنت نازل منه من شويه) بيجروا ورا الناس..مشفتش الناس راحت فين بس كتير منهم نزل من الكوبرى على السلالم الي ناحيه النيل. و بعد شويه لاقيت العساكر نازله من فوق و راجعين لمكانهم تانى..بعد حوالى 10 او 15 دقيقه شفت حوالى عربيتين امن مركزى جايه من ناحيه المتحف و داخلين ماسبيرو و الناس حدفتهم بالطوب و لفوا تانى تحت الكوبرى و راحوا ناحيه التحرير.
 |
| صوره (4) المسيره متجهه الى ماسبيرو |
بعد اقل من دقايق مشيت ناحيه التحرير عشان اقابل صديقتى تانى و نروح..و انا عند عبد المنعم رياض بس ناحيه المتحف و فى طريقى الى التحرير لقيت كميه كبيره من الغاز المسيل و بيتحدف من جوه التحرير فى ناحيتنا..مكانش فيه ناس كتير يمكن اقل من 200 واحد مثلا و كان فيه ناس شبكت ايديها فى ايد بعض و كونوا زى ساتر عشان يحمينا و ميحصلش احتكاكات تانيه. لفيت انا و صدقتى و قلنا هندخل لانى مشفتش عساكر جوه لكن الغاز كان موجود. طلعنا على الرصيف من ناحيه الشمال و انت داخل على التحرير و مشينا اقل من 10 خطوات و مقدرناش لأن الغاز كان جامد جدا و احنا مش شايفينه لانه شفاف. رجعنا تانى و قلنا ندخل من وسط البلد..انا للاسف مش حافظ اسامى الشوارع جوه بس وصلنا مع اول تقاطع لقينا عساكر جيش برضه بالخوذه السوداء و الدروع واقفين بعرض الشارع و قالولنا محدش يعدى، دخلنا فى شارع جانبى و طلعنا من وراهم و مشينا شويه لقينا برضه عساكر اكتر و قافلين الشارع المؤدى لميدان طلعت حرب دخلنا شارع جانبى و سمعنا ضرب طلقات نار و لقيت العساكر بتجرى ورا ناس، دخلنا شارع تانى شفنا منه ميدان طلعت حرب كان الناس الى فيه واقفه ورا العساكر مشيت و العساكر بتجرى ورا ناس تانيه و بيقفلوا الميدان. و اخيرا قابلت احد اصدقنا و روحنا و ده كان فى حدود الساعه 10 مساءا.
 |
| النعوش عند المستشفى القبطى منتظره ضحايا معركه ماسبيرو |
اسف ان الشهاده طويله و لكنى حرصت ان اذكر جميع التفاصيل و التى قد تفيد بأى شىء.
و ده فيديو انا صورته ساعه رش الميه على البلطجيه
